Flugeldasýning í lokaþættinum

„Það verður ekki önnur þáttaröð,“ fullyrðir Steindi Jr.

Lokaþátturinn í þriðju þáttaröð Steindans okkar, og jafnframt sá síðasti í seríunni, fer í loftið á fimmtudagskvöld. „Við sáum þetta alltaf fyrir okkur sem þrjár sjónvarpsseríur. Við erum ógeðslega sáttir með þær, sérstaklega þá þriðju. Það er búið að vera rosalega gaman að taka hana upp en þetta hefur verið mjög langt ferli,“ segir Steindi. „Við höfum verið að skrifa „sketsa“ og alltaf farið beint í tökur. Við höfum gert þetta stanslaust með mjög litlum pásum í þrjú ár. Núna langar okkur að prófa að gera eitthvað nýtt.“

Hann og samstarfsmaður hans, Ágúst Bent, eru með nokkur járn í eldinum varðandi næstu verkefni. Ekki er samt tímabært að upplýsa um þau strax. Eftir að Steindanum okkar lýkur ætla þeir að undirbúa DVD-útgáfu þáttanna sem kemur út fyrir jólin, auk þess sem nóg verður að gera við uppákomur á hinum ýmsu skemmtunum.

En hvernig verður lokaþáttur Steindans? „Við erum að enda þriðju seríuna og jafnframt þá seinustu þannig að við ætlum að ljúka þessu með flugeldasýningu. Það verður svakalegt lokaatriðið sem við höfum verið að taka upp undanfarna þrjá daga,“ segir hann og heldur áfram: „Ég vil nýta tækifærið og þakka fyrir áhorfið í gegnum seríurnar og þakka öllum fyrir sem eru búnir að peppa okkur upp í gegnum tíðina.“- fb