Leituðu að tökustöðum fyrir stórmynd - Hrifnastir af jöklunum

„Ég held að við höfum heimsótt alla staði á Íslandi fyrir utan Raufarhöfn," segir Árni Björn Helgason hjá Saga Film. Hann sá um að lóðsa tvo frægustu tökustaðastjóra í Hollywood um Ísland í lok september.

Tökustaðastjórarnir Ilt Jones og Dow Griffith komu hingað ásamt blaðamanni vefsíðunnar The Location Guide. Jones og Griffith sjá um að flakka heimshorna á milli í leit að tökustöðum fyrir stærstu kvikmyndaframleiðslur vestanhafs. Þeir eru með myndir eins og The Dark Knight Rises og The Bourne Legacy á ferilskránni. „Jones komst með stuttum fyrirvara vegna þess að leikarinn Robert Downey Jr. fótbrotnaði og þurfti því að gera hlé á tökum á Iron Man 3 sem hann er að vinna í núna. Það var mjög gaman að vera innan um þess reynslubolta í bransanum. Þessir tveir eru án efa virtustu mennirnir í geiranum."

Ástæðan fyrir komu Griffith og Jones var leit að tökustöðum fyrir nýja mynd. „Ég get því miður ekki sagt nafnið á henni, en get staðfest að þetta er stórmynd sem á að taka upp á næsta ári. Þeir mynduðu landið í bak og fyrir og svo krossar maður bara putta og vonar að leikstjóranum líki það sem hann sér," segir Árni Björn en alls dvöldu félagarnir hér á landi í níu daga.

Vefsíðan The Location Guide fjallar um ferðalagið í stórri grein. Þar er hörkuleg náttúra Íslands dásömuð ásamt gestrisni og þjónustulund Íslendinga sem kunna greinilega á þarfir kvikmyndatökuliða, að sögn síðunnar. „Það eru einna helst jöklarnir sem heilla ,því það er svo sjaldgæft að ekki þurfti að fara lengra eða hærra upp til að mynda snæviþakta auðn," segir Árni og bætir við að Ísland sé heldur betur búið að stimpla sig inn sem verðugur vettfangur til stórrar kvikmyndaframleiðslu. „Síðustu tvö ár hafa verið rosalega góð í þessum geira og það lítur út fyrir að ekkert lát sé þar á."

Meðal þeirra mynda sem hafa verið teknar upp hér á landi undanfarið eru Promotheus, Oblivion, The Secret Life of Walter Mitty og svo er leikstjórinn Alan Taylor á leiðinni hingað á næstu dögum með tökulið Thor 2.

alfrun@frettabladid.is