Áhugaljósmyndarinn væri betra heiti

"Ég held að það sé sterkari leikur að kalla þáttinn Áhugaljósmyndarinn eða Þáttur áhugaljósmyndara," segir Gunnar Leifur Jónasson, atvinnuljósmyndari og varaformaður Ljósmyndarafélags Íslands.

Hann á við heiti raunveruleikaþáttarins Ljósmyndarinn sem hefur göngu sína á Skjá einum eftir áramót. Þar verður fólki með áhuga á ljósmyndun gefið tækifæri til að sýna hæfileika sína bak við linsuna, en opnað var fyrir umsóknir um mánaðamótin.

Hallgerður Hallgrímsdóttir, annar dómara þáttarins, lýsti þáttunum í viðtali við Fréttablaðið á dögunum sem risastórri ljósmyndasamkeppni. Þar hvatti hún alla til að sækja um sem myndavél geta valdið. Af því má draga að þátttakendur eru fæstir löggildir ljósmyndarar en ljósmyndun er lögvernduð iðngrein.

"Menn eru ógurlega heitir í sambandi við lögverndun innan stéttarinnar. Það að vera ljósmyndari er ekki bara að ýta á takka, en í huga almennings er þetta því miður oft lagt að jöfnu," segir Gunnar og bætir við að margir áhugaljósmyndarar selji vinnu sína sem atvinnuljósmyndarar.

"Ég held að það væri skynsamlegt að breyta um titil og það mun ekki rýra gildi þáttarins," segir Gunnar sem þykir þó hugmyndin að þættinum frábær í alla staði.

- hþt