Síminn sem stöðumælir

„Leggja-þjónustan er búin að vera í boði frá því í mars 2008 og fólk hefur getað hringt inn eða sent sms til að borga í stöðumæla. Nú erum við þó búin að bæta þessum möguleika við að hægt sé að nota app á símanum,“ segir Hreinn Gústavsson hjá hugbúnaðarfyrirtækinu Strokki.

Leggja er samstarfsverkefni Strokks og Bílastæðahúss og hægt að nota hana á öllum gjaldsvæðum Bílastæðasjóðs og í bílastæðahúsi Hörpu. „Þetta er barnið okkar og búið að vera það frá upphafi. Þetta virkar bara eins og að mæta í vinnu en fólk stimplar sig í rauninni bara inn og út úr stæðunum,“ segir Hreinn, en með því að nota þjónustuna er aðeins greitt fyrir þann tíma sem bíllinn er í stæðinu. Það eru tæplega 6.000 notendur sem nýta sér þjónustuna sem stendur til boða fyrir alla. „Þetta er mjög einfalt og allir ættu að geta notfært sér þetta. Mamma á til dæmis ekki í neinum vandræðum með þetta,“ segir Hreinn. Hægt er að kynna sér þjónustuna betur á heimasíðunni Leggja.is.