Eldhætta af völdum brunavarnabúnaðar

Neyðarlínunni barst tilkynning um eld á þriðju hæð í húsi við Laugaveg í Reykjavík á þriðjudagskvöld. Slökkvilið var sent á staðinn og slökkti og reykræsti. Þar var ekki mikill eldur en töluverður reykur. Talið er að kviknað hafi í neyðarútgangsljósi í húsinu.

Mannvirkjastofnun sér um að votta eldvarnatæki og hefur áður þurft að hafa „afskipti" af neyðarútgangsljósum. Björn Karlsson, forstjóri stofnunarinnar, segir að starfsmenn hennar muni óska upplýsinga um umræddan öryggisbúnað. „Ef við teljum ástæðu til þá sendum við okkar mann til að skoða fyrirbærið," segir Björn. „Núna kemur þetta upp og við munum biðja um að fá þetta ljós sem brann í fyrradag og annað nýtt svo við getum rannsakað og athugað hvort ástæða sé fyrir innköllun."

Árið 2004 komu upp nokkur tilvik þar sem neyðarlampar brunnu. Lampar brunnu til að mynda á Heilsuverndarstöðinni, á Þjóðarbókhlöðunni, B&L, á leikskóla og í framhaldsskóla. Ekki var um mjög alvarleg tilvik að ræða en lamparnir voru innkallaðir í samráði við heildsala.

„Fyrsta innköllunin var árið 2004, þá höfðu orðið nokkrir brunar," segir Birgir Ágústsson, rafmagnstæknifræðingur hjá Mannvirkjastofnun. „Sumt af þessu varð nú þannig að lampinn brann bara."

„Við fórum að pressa á að fá einhverja vitneskju um þessa bruna. Loks sagði framleiðandinn að það væri galli í þétti, ef ég man rétt," rifjar Birgir upp. „Það gilti fyrir lampa með ákveðin framleiðslunúmer. Það var innkallað í samvinnu við umboðsaðilann hér."

„Síðan, árin 2008 og 2009, kom aftur upp tilvik í lampa af þessari gerð, nema það var nýrri lampi en okkur hafði verið sagt að væri gallaður."

Þá var aftur kannað hvað olli brunum og á endanum voru þær vörur innkallaðar. Birgir segist ekki vita hvort lampinn sem brann á Laugavegi á þriðjudag hafi borið umrædd framleiðslunúmer. „Það þarf ekkert endilega að vera að um einhvern sérstakan galla sé að ræða. Nánast allt sem notað er getur bilað."

Bjarni Kjartansson hjá eldvarnaeftirliti höfuðborgarsvæðisins segir enga ástæðu til þess að treysta ekki öryggisbúnaði bygginga. „Þar sem er rafmagn, þar getur kviknað í. Það er einfaldur sannleikur. Hins vegar er það kannski kaldhæðnislegt að neyðarlampar brenni."

birgirh@frettabladid.is