Svartklæddir á tímaflakki

Will Smith bregður sér aftur í hlutverk Agent J í stórmyndinni Men in Black sem frumsýnd verður annað kvöld.

Þriðja myndin um hina svartklæddu útsendara leyniþjónustu Bandaríkjanna verður frumsýnd í Sambíóunum annað kvöld. Will Smith fer sem áður með hlutverk Agent J og Tommy Lee Jones leikur hinn fámála Agent K ásamt Josh Brolin.

Söguþráður myndarinnar er á þá leið að J er sendur aftur til ársins 1969 til þess að bjarga lífi samstarfsmanns síns, Agent K, og um leið örlögum jarðarinnar. Hann slæst í lið með ungum K, sem leikinn er af Josh Brolin, til þess að forða mannkyninu frá hættunni og kemst um leið að ýmsum leyndarmálum er varða alheiminn sem K hafði ekki deilt með honum áður. Með önnur hlutverk fara Emma Thompson, sem leikur Agent O, og söngkonurnar Nicole Scherzinger og Lady Gaga. Sem áður er það Barry Sonnenfeld er leikstýrir myndinni, en hann var einnig við stjórnvölinn við gerð fyrri myndanna tveggja.

Men in Black 3 fær misjafna dóma á vefsíðunni Rottentomatoes.com og skiptast gagnrýnendur á um að hæla henni og segja hana eintóma þvælu. Myndinni hefur verið lýst sem háværri en hún sé þrátt fyrir það töluvert skemmtilegri en allur sá fjöldi stórmynda sem frumsýndur hefur verið undanfarin ár. Annar gagnrýnandi segir það ekki boða gott þegar hinn heillandi Will Smith getur ekki gert sér upp æsing á sannfærandi hátt.