Í útrás með samfestinga eftir auglýsingu á Facebook

„Það er óhætt að segja að samfestingurinn sé kominn í útrás. Þetta hefur gengið mjög vel," segir Karl Garðarsson eigandi fyrirtækisins Weezo sem selur samfestinga fyrir fullorðna.

Gallarnir hafa notið mikilla vinsælda hér á landi en Karl hefur selt um 3.000 stykki síðan síðasta sumar. Í mars keypti Karl auglýsingar fyrir Weezo-samfestingana á Facebook í Danmörku og viðtökurnar hafa ekki látið á sér standa.

„Nú höfum við selt milli 7-800 galla til útlanda og eru Danirnir okkar helstu kúnnar. Það er miklu meira en við bjuggumst við og sýnir bara mátt samskiptasíðunnar og netsins," segir Karl en samfestingarnir fást einungis í vefversluninni Weezo.is.

„Ástæðan fyrir að okkar gallar eru vinsælir er að við erum að selja þá á betra verði en er annars staðar. Okkar samfestingar eru frá 12 þúsund krónum en ég veit til þess að búðir úti eru að selja alveg eins galla á 30-35 þúsund krónur. Svo það borgar sig fyrir Danina að versla við okkur þrátt fyrir tolla og sendingarkostnað."

Bómullarsamfestingurinn með hettu hefur verið vinsæll hjá frændum okkar í Skandinavíu um nokkurt skeið en það var síðasta sumar sem Íslendingar tóku við sér. Gallarnir eru framleiddir fyrir Karl í Kína.

„Við sjáum greinilegt sölumunstur milli bæja úti á landi og ég held að við höfum selt fleiri samfestinga til Neskaupstaðar en fjöldi íbúa er þar. Nú eru Vestmannaeyjar að taka við sér en við höfum selt minnst til höfuðborgarsvæðisins. Ætli tískan sé ekki misjöfn milli landshluta?"

Fyrirtækið var stofnað síðasta sumar og óhætt er að segja að Karl hafi hitt naglann á höfuðið með því að hefja sölu samfestinganna. Nú veltir litla fyrirtækið hans tugum milljóna króna og reksturinn er orðinn fullt starf hjá Karli. „Þetta er dæmi um fyrirtæki sem var búið til úr engu. Við Íslendingar höfum verið lengi að kveikja á mætti netsins en þar þarf maður ekki að hafa mikið milli handana til að stofna fyrirtæki," segir Karl sem nú þegar er byrjaður að undirbúa stækkun merkisins. „Við stoppum ekki núna og ætlum að framleiða fleiri vörur í ætt við samfestingana innan skamms."

alfrun@frettabladid.is