Hver á landi fegurst er?

Ævintýra- og gamanmyndin Mirror Mirror var frumsýnd í gærkvöldi. Myndin er byggð á hinu klassíska ævintýri Grimms-bræðranna um Mjallhvíti og dvergana sjö, en í þetta skipti mæta stjörnur á borð við Juliu Roberts og Lil Collins á svæðið.

Ævintýrið um Mjallhvíti og dvergana sjö birtist kvikmyndahúsagestum í nýrri mynd í gaman- og ævintýramyndinni Mirror Mirror. Leikstjórinn Tarsem Singh stýrir þeim Juliu Roberts, Lily Collins, Armie Hammer og Sean Bean í þessari litríku kvikmynd sem segir frá baráttu Mjallhvítar við vondu stjúpuna.

Flestir þekkja líklega söguþráð kvikmyndarinnar sem segir á gamansaman hátt frá ævintýrum Mjallhvítar sem rekin er út í skóg af afbrýðisamri stjúpu sinni en er bjargað af sjö dvergum. Það er Julia Roberts sem fer með hlutverk illu drottningarinnar á meðan Lily Collins fer með hlutverk hinnar fögru og ljúfu Mjallhvítar.

Singh á að baki kvikmyndir á borð við The Cell, The Fall og Immortals sem frumsýnd var í fyrra. Myndir hans þykja mjög myndrænar og hefur búningahönnun Eiko Ishioka mikið um það að segja, en Mirror Mirror var jafnframt síðasta myndin sem Ishioka vann við áður en hún lést í janúar á þessu ári.

Myndin hefur fengið misjafna dóma; sumir segja hana ófyndna og leiðinlega á meðan aðrir gagnrýnendur segja hana fallega, myndræna og skemmtilega. Vefsíðan Rotten Tomatoes gefur Mirror Mirror 49 rotin prósent en gagnrýnandi The Telegraph gefur myndinni fjórar stjörnur af fimm mögulegum.