Ekki hrifin af Cowell

Sharon Osbourne vandar fyrrum yfirmanni sínum, Simon Cowell, ekki kveðjurnar. Hún sagði Cowell vera valdafíkil og eiginhagsmunasegg í spjallþættinum The Talk.

Osbourne starfaði um hríð sem dómari í raunveruleikaþættinum The X Factor UK sem er hugarfóstur Cowells. „Hann er ríkur, valdamikill og skapandi. Hann á allt, en þú getur ekki keypt tólin,“ sagði Osbourne um fyrrum yfirmann sinn um leið og vísaði þar til manndóms Cowells.

Í þættinum segist Osbourne hafa hætt sem dómari í þáttunum vegna þess að henni hafi ekki þótt starfið skemmtilegt lengur og að það hafi reitt Cowell til reiði. „Ég hafði sigrast á krabbameini og lofað sjálfri mér að gera aldrei nokkuð sem ég hefði ekki gaman af. Ég þurfti að búa fjarri fjölskyldu minni og ég var óánægð og ákvað að hætta.“