Hætt hefur verið við að skera niður allt sauðfé á bænum Merki á Jökuldal. Riða greindist í einu heilasýni úr kind þaðan sem slátrað var á Vopnafirði í haust.
„Samkvæmt greiningum á Tilraunastöðinni á Keldum þá er riðan í flokki óhefðbundinna tilfella af riðu eða af afbrigðinu NOR 98 og er þetta fjórði bærinn á Íslandi þar sem þetta afbrigði greinist,“ segir á vef Matvælastofnunar. „Við þeim tilfellum hefur verið brugðist með niðurskurði, eins og um hefðbundna riðu væri að ræða.“ Stefanía Þorgeirsdóttir, sérfræðingur á Keldum, skrifaði grein um málið í Bændablaðið en hún er einn helsti sérfræðingur landsins í riðu. Í greininni kemur fram að nokkur óvissa ríki um skilgreiningu á riðuafbrigðinu, sem sé greinilega mun minna smitandi en hefðbundin riða.
Yfirdýralæknir hefur nú ákveðið að ákveðin millileið verði farin. Öllum kindum sem eru fimm ára og eldri verði fargað, ásamt kindum sem eru mest skyldar jákvæðu kindinni. Þá verði heilasýni rannsökuð og ákvörðun um frekari niðurskurð tekin í framhaldi af niðurstöðum rannsókna. - óká
Arsenal
Leeds
