Ekki má fara of geyst í lánveitingar

Húsnæðisverð á Íslandi er líklegt til að hækka um samanlagt 16% á næstu tveimur árum. Að teknu tilliti til verðbólguspár jafngildir það um 8,5% hækkun að raunvirði. Þetta er mat greiningar Íslandsbanka sem birt hefur spá um þróun íbúðaverðs.

Í spánni kemur fram að meðal helstu aflvaka líklegra hækkana verði áframhaldandi bati í efnahagslífinu, sögulega lágir vextir, vaxandi kaupmáttur og minni óvissa um skuldastöðu heimila. Þá hafi á síðustu misserum safnast upp óuppfyllt eftirspurn eftir húsnæði. Helsta forsenda spárinnar er að batinn í hagkerfinu haldi áfram á næstunni án bakslags en ýmsir óvissuþættir eru þó nefndir sem sett geta strik í reikninginn. Ingólfur Bender, forstöðumaður greiningar Íslandsbanka, segir að hækki húsnæðisverð muni það koma skuldugum heimilum til góða. „Þetta getur auk þess ýtt undir efnahagsbatann en þá þarf að tryggja að hækkunin verði varanleg og sérstaklega að passa að ekki verði farið of geyst í nýjar lánveitingar,“ segir Ingólfur.

Gangi spáin eftir mun sú lækkun sem varð á nafnverði íbúðarhúsnæðis eftir hrun hafa gengið til baka um mitt þetta ár. Raunverð er þó enn langt undir þeim hæðum sem það náði fyrir hrun.- mþl