Gengisdómur kostaði Arion 13,8 milljarða

Arion banki birti fyrstur allra áætlað tap sitt vegna gengislánadóms. Tapið byggir á einum af fjórum sviðsmyndum FME. Útlán bankans jukust mikið vegna kaupa á lánasafni þrotabús Kaupþings. Farinn að huga að lánshæfiseinkunn.

Arion banki færði eignir sínar niður um 13,8 milljarða króna vegna kostnaðar við endurreikning gengislána í kjölfar dóms Hæstaréttar í febrúar síðastliðnum. Útreikningurinn byggir á sviðsmynd sem Fjármálaeftirlitið (FME) hefur teiknað upp vegna dómsins. Alls eru sviðsmyndir FME fjórar og Arion banki valdi þá sem hann taldi líklegasta. Sá fyrirvari er þó gerður á útreikningnum að hann gæti breyst umtalsvert, til hins betra eða verra fyrir bankann, ef túlkun á niðurstöðu Hæstaréttar tekur breytingum frá þeirri sviðsmynd sem valin var. Þetta kemur fram í ársreikningi Arion banka sem birtur var í gær. Bankinn er fyrstur stóru viðskiptabankanna þriggja að birta mat á kostnaði sínum vegna niðurstöðu Hæstaréttar í febrúar.

Hagnaður Arion banka eftir skatta var 11,1 milljarður króna á síðasta ári og arðsemi eiginfjár 10,5%. Vaxtatekjur bankans jukust milli ára og voru 23,4 milljarðar króna. Þá jukust þóknanatekjur úr 6,9 milljörðum króna í 10,7 milljarða króna. Á kynningarfundi með fjölmiðlum í gær sagði Höskuldur H. Ólafsson, bankastjóri Arion, að tæpur helmingur þeirra væri tilkominn vegna greiðslukortaþjónustu dótturfélagsins Valitor og um fjórðungur vegna eignastýringar bankans. Að mati Höskuldar er niðurstaðan viðunandi.

Útlán Arion banka jukust úr 451,2 milljörðum króna í 561,6 milljarða króna á árinu 2011 og eignir hans jukust því umtalsvert á liðnu ári. Tvennt var þó ráðandi í þessari breytingu. Annars vegar greiddi Össur hf. upp öll sín lán hjá Arion, sem voru vel á þriðja tug milljarða króna, í mars 2011 með endurfjármögnun frá erlendum bönkum. Hins vegar tók Arion yfir íbúðalánasafn þrotabús Kaupþings, sem metið er á 120 milljarða króna, og hafði áður verið í sérstökum sjóði.

Innstæður jukust og eru sem áður uppistaðan í fjármögnun bankans, eða 67% hennar. Helstu stjórnendur Arion greindu frá því á kynningarfundinum í gær að ein þeirra lykilspurninga sem bankinn stæði frammi fyrir í ár væri hvort, og þá hvenær, hann ætti að sækjast eftir lánshæfiseinkunn hjá alþjóðlegum matsfyrirtækjum. Slíkt yrði lykillinn að því að blanda fjármögnun hans betur þannig að hún hvíldi ekki jafn mikið á innlánum. Hvort það yrði gert færi þó eftir þróun á lánshæfiseinkunn íslenska ríkisins. Ísland er sem stendur með lægstu einkunn í fjárfestingaflokki. Sú einkunn þyrfti að hækka um eitt eða tvö hök.thordur@frettabladid.is