Viðmið um framboð varhugaverð

„Það er margt til bóta í frumvarpinu en jafnframt margt í óvissu.“ Þetta segir Lárus Ólafsson, lögfræðingur hjá Samtökum verslunar og þjónustu, SVÞ, um frumvarp um breytingu á úthlutun tollkvóta á landbúnaðarvörum.

„Okkur líst vel á að mat ráðherra varðandi kvóta sem heimilt er að bjóða út verður ekki jafnhuglægt og áður. Það er búið að binda niður verklagsreglur og ráðherra ber að fara að ráðum ráðgjafanefndar,“ tekur Lárus fram.

Í frumvarpinu segir að framboð teljist ekki nægjanlegt sé viðkomandi vara ekki til stöðugrar dreifingar í að lágmarki 90 prósent magni af eftirspurn. Þetta eru varhugaverð viðmið, að mati Lárusar. „Í fyrsta lagi eru engar upplýsingar um hvernig þessi tala er fundin út. Okkur finnst þetta hár þröskuldur og hugsanlega ígildi tæknilegra hindrana.“

Samtök verslunar og þjónustu gera einnig athugasemdir við notkun ákveðinna gjaldeyrisviðmiða þegar um er að ræða tolla sem skylt er að bjóða út.

„Tollarnir eru klæddir í magntolla en nota ákveðið gjaldeyrisviðmið. Þegar gengi krónunnar er óhagstætt verður svigrúmið minna til þess að bjóða í þessa kvóta. Svona framsetning kann að draga úr áhuga manna á þeim,“ segir Lárus.

- ibs