Rannsókn á Íbúðalánasjóði tefst til hausts

Stjórnsýsla Rannsóknarnefnd Alþingis, sem gert var að rannsaka starfsemi Íbúðalánssjóðs frá árinu 2004 til ársloka 2010, náði ekki að ljúka starfi sínu á tilsettum tíma þar sem verkefnið reyndist mun umfangsmeira en í fyrstu var talið.

Við skipun nefndarinnar í upphafi septembermánaðar á síðasta ári, var gert ráð fyrir að úttektinni yrði lokið innan sex mánaða, en sá frestur rann út í síðustu viku.

„Það varð fljótlega ljóst að verkefnið yrði tímafrekara en talið var í fyrstu,“ segir Sigurður Hallur Stefánsson, formaður nefndarinnar, í samtali við Fréttablaðið.

„Umbeðin úttekt var yfirgripsmikil, en svo stækkaði verkefnið svo að segja með hverjum steini sem velt var. Því var ljóst að við myndum þurfa frest, sem við fengum frá forsætisnefnd Alþingis, en við göngum út frá því að ná að ljúka verkinu fyrir haustið.“

Fyrri tímamörk úttektarinnar miðast við breytingarnar sem gerðar voru á sjóðnum og lánareglum hans árið 2004.

Markmið rannsóknarinnar, samkvæmt þingsályktun um stofnun nefndarinnar, er í fyrsta lagi að „meta áhrifin af þessum breytingum, stefnu sjóðsins og einstökum ákvörðunum á þessum tíma á fjárhag sjóðsins og fasteignamarkaðinn í heild sinni, í öðru lagi að meta áhrifin af starfsemi Íbúðalánasjóðs á stjórn efnahagsmála og í þriðja lagi að leggja mat á hversu vel sjóðnum hefur tekist að sinna lögbundnu hlutverki sínu á þessu tímabili.“

Þegar niðurstöður liggja fyrir mun taka við heildarendurskoðun á sjóðnum og húsnæðislánakerfinu á Íslandi.- þj