Ársæll kom gögnum til DV

Ársæll Valfells, lektor við viðskiptafræðideild Háskóla Íslands, kom gögnum um Guðlaug Þór Þórðarson þingmann frá Fjármálaeftirlitinu til DV. Lögreglurannsókn fer nú fram vegna málsins.

Ársæll segist óafvitandi hafa dregist inn í málið. Maður sem komið hafi heim til hans hafi beðið hann að koma gögnum til Gunnars Andersen, þáverandi forstjóra FME. Gunnar hafi svo beðið hann að koma gögnunum til DV, sem hann hafi gert. „Ég hafði enga vitneskju um innihald sendingarinnar og hef þegar skýrt yfirvöldum frá aðkomu minni að þessu máli," segir í yfirlýsingu Ársæls. - þeb