Óvissa ríkir um kostnað Landsvirkjunar

Landsvirkjun segir ekki unnt að segja til um á kostnað fyrirtækisins vegna úrskurðar innanríkisráðuneytisins um að meta skuli vatnsréttindi til fasteignamats á þessu stigi.

Eins og fram kom í Fréttablaðinu í síðustu viku vill Fljótsdalshérað að Þjóðskrá meti vatnsréttindi í Jökulsá á Dal til fasteignamats á næstu tveimur mánuðum í kjölfar úrskurðar innanríkisráðuneytisns sem einmitt lýtur að vatnsréttindum í Jökulsá sem knýr Kárahnjúkavirkjun. Einnig að metin verði vatnsréttindi við Lagarfossvirkjun og Grímsárvirkjun sem sömuleiðis eru í sveitarfélaginu. Ætlunin er síðan að leggja fasteignagjöld á vatnsréttindin.Magnús Þór Gylfason, upplýsingafulltrúi Landsvirkjunar, segir niðurstöða ráðuneytisins vera þá að skrá skuli í fasteignaskrá vatnsréttindi sem skilin hafa verið frá jörð, og þau metin til verðs.

„Málið er til skoðunar innan Landsvirkjunar, en ekki hefur verið tekin afstaða til þess hvort látið verði reyna á niðurstöðuna fyrir dómstólum. Væntanlega hefur niðurstaðan fordæmisgildi og hefði því áhrif á mun fleiri aðila en Landsvirkjun,“ bendir Magnús á.

Að svo komnu máli er ekki hægt að segja með vissu hver áhrifin á Landsvirkjun geti orðið verði þetta hin endanlega niðurstaða. „Fasteignamat myndar grunn til álagningar fasteignagjalda en hins vegar liggur ekki fyrir á hvaða grundvelli verðmat á vatnsréttindum færi fram. Þá liggur ekki heldur fyrir hvort sveitarfélög ákveði að leggja skatt á vatnsréttindi í kjölfar niðurstöðu ráðuneytisins um skráningarskyldu þeirra,“ segir Magnús Þór.- gar