Níu af hverjum tíu hafa nú aðgang að hreinu vatni

Meira en tveir milljarðar manna hafa fengið aðgang að hreinu drykkjarvatni frá árinu 1990, sem þýðir að þúsaldarmarkmiði Sameinþjóðanna uðu þjóðanna um aðgengi að hreinu vatni hefur náðst. Frá þessum áfanga var greint á þriðjudag þegar Barnahjálp Sameinuðu (UNICEF) og Alþjóðaheilbrigðismálastofnunin (WHO) kynntu skýrslu um framfarir á sviði vatns og hreinlætis. Bætt aðgengi að drykkjarhæfu vatni þýðir meðal annars að vatnið er í lokuðum leiðslum eða vel birgðum brunnum svo óhreinindi og sýkingar komast ekki í það.

Árangurinn er viðurkenning fyrir þá sem sjá þúsaldarmarkmiðin ekki eingöngu sem draum heldur sem mikilvægt skref til að bæta heilsu og líf fólks, segir Ban Ki-moon aðalritari SÞ í formála skýrslunnar. Hann sagði jafnframt í tilefni af útgáfu skýrslunnar að fagna bæri þessum stóráfanga, en þetta er eitt af fyrstu markmiðunum sem nást.

Skýrslan sýnir þó einnig að verkinu er ekki lokið því ellefu prósent jarðarbúa, eða 783 milljónir manna, hafa ekki aðgang að hreinu vatni. Sá hluti þúsaldarmarkmiðsins sem snýr að hreinlætismálum er ekki í eins góðum farvegi. Markmiðið var að lækka hlutfall þeirra sem ekki hafa aðgang að viðunandi hreinlætisaðstöðu um helming fyrir árið 2015. 63 prósent jarðarbúa hafa aðgang að klósettum eða annarri aðstöðu sem heldur fólki úr snertingu við úrgang, en hlutfallið ætti að vera orðið 75 prósent eftir þrjú ár. Bætt hefur verið úr aðstöðu hjá 1,8 milljarði manna á síðustu tuttugu árum en enn skortir rúman milljarð manna aðgang að hreinlætisaðstöðu.

„Þetta eru sérstaklega góðar fréttir fyrir börn. Á hverjum degi láta yfir þrjú þúsund börn lífið af völdum niðurgangspesta,“ sagði Anthony Lake, framkvæmdastjóri UNICEF, við útgáfu skýrslunnar. Stefán Ingi Stefánsson, framkvæmdastjóri stofnunarinnar hér á landi, tekur í sama streng og segir tíðindin sýna að hægt sé að ná árangri. „Með samhentu átaki og einbeittum vilja getum við tryggt öllum börnum hreint vatn og viðunandi hreinlætisaðstöðu.“thorunn@frettabladid.is