Rúmur þriðjungur hefur íhugað sjálfsvíg

Rúmur þriðjungur þeirra sem leituðu sér hjálpar á Stígamótum í fyrra vegna kynferðisofbeldis höfðu verið í sjálfsvígshugleiðingum. Sextán prósent, eða 45 einstaklingar, höfðu gert eina eða fleiri tilraunir til sjálfsvíga. Þetta kemur fram í ársskýrslu Stígamóta.

„Við vitum auðvitað að sjálfsvígshugleiðingar eru þekktar almennt í samfélaginu en ég er alveg viss um að það er ekki þannig að meira en einn þriðji Íslendinga er að gæla við sjálfsvíg,“ segir Guðrún Jónsdóttir talskona Stígamóta.

Algengustu afleiðingar kynferðisofbeldis eru léleg sjálfsmynd, kvíði, skömm, depurð og sektarkennd samkvæmt fólki sem kom í viðtöl á Stígamót í fyrra. Yfir sjötíu prósent viðmælenda upplifðu þessar tilfinningar. Flestir, eða 78,8 prósent höfðu upplifað lélega sjálfsmynd og kvíða og 77 prósent upplifðu skömm. Tæplega sjötíu prósent höfðu upplifað svipmyndir, sem eru myndir eða minningar tengdar kynferðisofbeldinu sem skjóta skyndilega upp kollinum og valda hugarangri. Þá eru reiði, erfið tengsl við maka eða vini, ótti og tilfinningalegur doði meðal algengra afleiðinga.

„Okkar fólk er að dröslast í gegnum lífið með skömm og sektarkennd yfir mannréttindabrotum sem einhverjir aðrir frömdu á þeim. Það er eitthvað öskrandi rangt við það,“ segir Guðrún. „Þetta eru ansi langlífar ranghugmyndir sem við erum að eyða miklu púðri í að breyta vegna þess að það eru enn svo ríkjandi fordómar um það fólk sem er beitt ofbeldi og vegna þess að ábyrðin á ofbeldinu er ekki sett þar sem hún á heima, nefnilega hjá þeim sem beita ofbeldi.“

Tæp fjörutíu prósent þeirra sem leituðu til Stígamóta, eða 109 einstaklingar, höfðu ekki rætt ofbeldið við neinn fagaðila áður. 27 prósent höfðu rætt við sálfræðing, sextán prósent við lækni og þrettán prósent geðlækni. Flestir höfðu þó sagt einhverjum frá ofbeldinu áður en leitað var til Stígamóta. Algengast er að vini eða vinkonu hafi verið sagt frá ofbeldinu, en í 180 skipti hafði vini verið sagt frá því. 130 höfðu sagt maka frá, 127 sögðu móður frá og 121 hafði sagt fagaðila frá ofbeldinu.

thorunn@frettabladid.is