Verða af hundruðum milljóna króna

„Ljóst er að Hafnarfjörður hefur orðið af tekjum sem skipta tugum ef ekki hundruðum milljóna vegna þessa,“ bókuðu fulltrúar minnihluta Sjálfstæðisflokks eftir að meirihluti skipulags- og byggingarráðs Hafnarfjarðar ákvað að gera átak í að leiðrétta skráningu fasteigna.

Meirihluti Samfylkingar og VG í ráðinu sagði það mikið hagsmunamál fyrir bæjarsjóð og íbúa Hafnarfjarðar að byggingarstig fasteigna væri rétt skráð. Umtalsverður árangur hafi náðst í þessu á undanförnum árum en áhersla yrði lögð á málið á næstu vikum og mánuðum.

„Samkvæmt staðfestum upplýsingum fulltrúa Sjálfstæðisflokksins í Skipulags- og byggingarráði hefur verið verulegur misbrestur á réttri skráningu byggingarstigs og þar af leiðandi innheimtu réttra fasteignagjalda af íbúðar-, verslunar- og iðnaðarhúsnæðis undanfarin ár. Eigendum fasteigna í Hafnarfirði sem hafa hirt um að skrá fasteignir sínar og greiða réttmæt gjöld til Hafnarfjarðarbæjar hefur verið stórlega mismunað í innheimtu fasteignagjalda vegna þessa,“ bókuðu sjálfstæðismenn. Þeir lögðu til rannsókn á ástæðu þess að skráningin hafi misfarist og úttekt á tekjutapi Hafnarfjarðar vegna þess. - gar