Ráð gert fyrir fundi um kjötkvóta í mánuðinum

Viðræður við Evrópusambandið (ESB) um aukningu á tollfrjálsum útflutningskvóta Íslands á lambakjöti frestast fram á nýja árið. Snemmsumars var frá því greint að þreifingar væru hafnar um aukningu kvótans og svo bárust af því fregnir í september að könnunarviðræður ættu að hefjast í þeim mánuði.

Samkvæmt upplýsingum frá utanríkisráðuneytinu er enn beðið umboðs til viðræðna frá framkvæmdastjórn ESB. Búist hafi verið við því fyrir áramót, en nú sé talið að það verði í janúar.

Skortur á lambakjöti í heiminum olli á árinu verðhækkunum og vöruskorti sem gerði að verkum að útflutningur héðan varð hagkvæmari en verið hafði. Gildandi samningur um sölu landbúnaðarafurða milli ESB og Íslands frá árinu 2007 kveður á um að héðan megi flytja tollfrjálst til landa sambandsins 1.850 tonn af lambakjöti, 380 tonn af skyri og 350 tonn af smjöri.

Á móti mega ríki ESB selja hingað án tolla um 100 tonn af nautakjöti og 200 tonn af svína- og alifuglakjöti, auk osta og unninna kjötvara.

Lagt var upp í viðræðurnar við framkvæmdastjórn sambandsins á þessu ári með það fyrir augum að rúmlega tvöfalda útflutning lambakjöts héðan, færa tollkvótann í 4.000 tonn. Í viðræðum á nýju ári kemur svo væntanlega í ljós hversu mikið þyrfti á móti að heimila aukningu á innflutningi á landbúnaðarvörum frá ríkjum ESB.

Í sumar sagði Sindri Sigurgeirsson, formaður Landssamtaka sauðfjárbænda, að bændur treystu sér til að auka framleiðslu sína um 10 til 20 prósent á næstu fimm árum. Slík framleiðsluaukning hafi verið til umræðu hjá bændum vegna horfa á auknum útflutningi.

Kæmi til aukningar yrði hins vegar lögð áhersla á að auka sjálfbærni í framleiðslunni, ekki ætti að ganga á landið.

Í sama streng tók Ágúst Andrésson, forstöðumaður hjá Kaupfélagi Skagfirðinga, sem taldi framfarir í beitarstýringu og á öðrum sviðum þýða að bændur gætu aukið framleiðslu sína umtalsvert. Aukningin yrði þó aldrei nema dropi í hafið í samanburði við heildarinnflutning ESB, sem flytti inn um 300 þúsund tonn af kjöti á ári hverju.