Gift í 76 ár og létust með 16 klukkustunda millibili

Hjónin Cleda Leavitt Blair og Rosemond Blair létust í Idaho í Bandaríkjunum í síðustu viku. Þau höfðu verið gift í 76 ár og létust með 16 klukkustunda millibili.

Rosemond hélt í hönd eiginkonu sinnar þegar hún lést á miðvikudaginn í síðustu viku. Cleda Leavitt Blair var 95 ára gömul. Eiginmaðurinn, hinn 94 ára gamli Rosemond lést 16 klukkustundum seinna.

Hjónin létust á elliheimili í Idaho en þau höfðu búið þar síðustu sjö mánuði.

„Þau voru alltaf saman," sagði Boyd Blair AP fréttstofunni en hann er sonur hjónanna. „Þau voru óaðskiljanleg allt sitt líf og ég geri ráð fyrir að þau séu enn óaðskiljanleg á betri stað."

Rosemond og Cleda gengu í hjónaband árið 1935. Nokkrum árum seinna gekk Rosemond í sjóherinn og barðist í seinni heimsstyrjöldinni.

Að stríðinu loknu fluttust hjónin til Oregon og eignuðust tvö börn. Alls áttu þau 12 barnabörn og 32 barnabarnabörn.

„Það var sífellt daður í gangi hjá þeim," sagði Marilyn, eiginkona Boyds. „Þau voru hið fullkomna par."

Cleda barðist við brjóstakrabbamein í áraraðir. Það kom í hlut Rosemond að annast eiginkonu sína. Á þeim tíma var Rosemond sjálfur heilsuveill og óttuðust aðstandendur þeirra að hann væri að reyna of mikið á sig.

„Þau voru bestu vinir," sagði Kelly Martin, forstöðukona elliheimilisins.