Metnaðarfullir foreldrar eyðilögðu rótgróna hefð

Ágengir foreldrar eru orsökin fyrir því að hinni árlegu páskaeggjaleit í Colorado Springs hefur verið aflýst. Eggjaleitin hefur ávallt verið ætluð börnum en á síðasta ári gátu foreldrarnir ekki hamið sig.

Það tók foreldrana aðeins nokkrar sekúndur að finna öll páskaeggin á síðasta ári. Börnin störðu agndofa á eftir foreldrum sínum sem hoppuðu inn í lystigarðinn og leituðu að páskaeggjunum. Þeir komu síðan til baka færandi hendi og börnin fengu eggin sín.

Skipuleggjendur segja að eggjaleitin hafi tekið stakkaskiptum með athæfi foreldranna og að ekki sé lengur um fjölskylduvæna hefð að ræða. Því hefur verið ákveðið aflýsa eggjaleitinni í ár.

Uppeldisráðgjafar segja að atvikið sé afar gott dæmi um hið svokallaða „þyrlu-foreldri." Slíkir foreldrar sveimi sífellt yfir börnum sínum og eru nátengdir öllum þáttum daglegs lífs barna sinna. Er þetta gert til að börnin nái sem mestum árangri á mismunandi sviðum lífsins.

„Þau einfaldlega gátu ekki staðist mátið, þau gátu ekki ímyndað sér að börnin þeirra myndu ekki fá páskaegg," segir Ron Alsop, fyrrverandi blaðamaður hjá Wall Street Journal og höfundur bókarinnar „The Trophy Kids Grow Up" en hún fjallar um uppvaxtarár árþúsundabarnanna.

„Þetta er fullkomin birtingarmynd á uppvexti árþúsundabarna," segir Alsop. „Foreldrar finna fyrir sterkri þörf fyrir að vera hluti af öllum þáttum í lífi barna sinna. Þau gefa börnum þeim ekki tækifæri á að gera mistök. Þar af leiðandi læra börnin ekki af mistökum sínum - sem er auðvitað mjög slæmt."

Ekki er vitað hvort að skipuleggjendur leitarinnar ætla endurvekja hefðina að ári.