Bítlamynd á þrjár milljónir

Sjaldséð ljósmynd af Bítlunum að labba í „hina áttina“ yfir gangbrautina á umslagi plötunnar Abbey Road seldist fyrir rúmar þrjár milljónir króna á uppboði í London.

Ljósmyndarinn Iain Macmillan tók myndina. Þar ganga þeir John Lennon, Paul McCartney, George Harrison og Ringo Starr frá hægri til vinstri yfir gangbrautina rétt fyrir utan hljóðverið Abbey Road þar sem þeir tóku upp samnefnda plötu árið 1969. Á umslagi plötunnar ganga þeir í hina áttina. Ljósmyndin er einnig frábrugðin þeirri á umslaginu því á henni er McCartney í sandölum í stað þess að vera berfættur, auk þess sem hann heldur ekki á sígarettu.

Talið var að ljósmyndin myndi seljast fyrir tæpar tvær milljónir en hart var barist um hana og endaði hún því í rúmum þremur.