Frumvarpinu sjálfu ekki breytt

„Við erum annars vegar að svara spurningum og rökstyðja okkar sýn á stöku ákvæði sem ábendingar komu fram um, og hins vegar nefndum við valkosti við umdeild ákvæði,“ segir Gísli Tryggvason, einn fulltrúa í stjórnlagaráði, í samtali við Fréttablaðið.

Ráðið lauk störfum í gær eftir fjögurra daga fund þar sem farið var yfir spurningar frá stjórnskipunar- og eftirlitsnefnd Alþingis um ákvæði í frumvarpi til stjórnskipunarlaga.

„Við breytum ekki frumvarpinu, en við stingum upp á valkostum við ýmis ákvæði ef Alþingi, sem fer með frumkvæðisvald að stjórnarskrárbreytingum, vill sjá breytingar þar á.“ Gísli nefnir sem dæmi að ráðið undirstriki að málskotsréttur forseta haldist óbreyttur í öllum tilfellum. Þá komi fram í svörum þess að þó Alþingi ákveði að setja inn ákvæði um að minnihluti á þingi fái málskotsrétt, eða að hækka hlutfall kjósenda sem frumvarpið tiltekur til að knýja fram þjóðaratkvæðagreiðslu, muni það ekki raska frumvarpinu eða kalla fram aðrar breytingar á því.

Varðandi framhaldið segir Gísli að sínar væntingar séu að nú verði frumvarpið lagt fyrir þjóðina í ráðgefandi þjóðaratkvæðagreiðslu meðfram forsetakosningum. „Þannig fær þjóðin að segja sína skoðun á frumvarpinu í heild sinni áður en Alþingi afgreiðir það endanlega.“- þj