Breið sátt nauðsynleg eigi áætlun að halda

Engin forsenda er fyrir því að sátt náist um rammaáætlun um verndun og nýtingu vatnsafls og jarðvarma ef ekki verður farið eftir faglegri niðurstöðu verkefnisstjórnar, segir Gústaf Adolf Skúlason, aðstoðarframkvæmdastjóri Samorku, samtaka orku- og veitufyrirtækja.

Gústaf segir nauðsynlegt að ná breiðri sátt um rammaáætlunina eigi hún að vera stefnumótun til lengri tíma frekar en áætlun núverandi ríkisstjórnar.

Eins og Fréttablaðið greindi frá á laugardag veldur rammaáætlunin enn deilum innan ríkisstjórnarflokkanna. Meðal annars er deilt um hvort stefnt skuli að því að leyfa virkjanir í neðri hluta Þjórsár eða setja þær í biðflokk. „Rammaáætlun verður alltaf pólitísk en ef nást á breið sátt um hana er það okkar mat að hún þurfi að byggja á skýrslu verkefnisstjórnarinnar,“ segir Gústaf. „Ef vikið verður langt frá niðurstöðunum verður þetta orðin rammaáætlun núverandi ríkisstjórnar.“

Verði það niðurstaðan er líkegt að þegar ný ríkisstjórn kemst til valda dusti hún rykið af tillögum verkefnisstjórnarinnar og breyti rammaáætluninni, segir Gústaf. Hann viðurkennir að ekki hafi öll orkufyrirtæki verið sátt við niðurstöður verkefnisstjórnarinnar, en skýrslan hafi verið faglega unnin og Samorka hafi fagnað henni.

Gústaf bendir á að miðað við fréttir úr herbúðum ríkisstjórnarinnar bendi margt til þess að í rammaáætlun verði aðeins þrjár mögulegar vatnsaflsvirkjanir í nýtingarflokki, sem sé miður. Rammaáætlunin gæti því allt eins heitið rammaáætlun um jarðhitavirkjanir.- bj