Banaslys á Eyjafjarðarvegi - sofnaði líklega undir stýri

Rannsóknarnefnd umferðarslysa hefur lokið rannsókn sinni á banaslysi sem varð á Eyjafjarðarbraut síðdegis þann 20. janúar í fyrra. Þá lést karlmaður sem var að skokka í vegarkantinum þegar bifreið var ekið á hann. Nefndin kemst að þeirri niðurstöðu að bíllinn hafi farið yfir á rangan vegarhelming, líklega vegna þess að ökumaðurinn hafi sofnað undir stýri.

Ökumaðurinn var ekki undir áhrifum áfengis eða ólöglegra lyfja þegar slysið átti sér stað en hann hafði neytt lyfs sem hann tók samkvæmt læknisráði. Þá sagðist ökumaðurinn hafa átt það til að „detta út, fá störu í nokkrar sekúndur, af óþekktri ástæðu, sem væri til rannsóknar." Að mati nefndarinnar hefur þetta ástand haft áhrif á ökuhæfi mannsins. Þá kemst nefndin að því að maðurinn hafi ekið of hratt miðað við aðstæður en að sögn hans sjálfs og farþega sem var með honum í bílnum var ekið á 70 - 90 kílómetra hraða.

Maðurinn sem lést var íklæddur endurskinsvesti og með höfuðljós. Hann hljóp allan tímann gegn akstursstefnu.