Götur Reykjavíkur fá andlitslyftingu

Reykjavíkurborg mun veita hundrað milljónum króna aukalega til gatnaframkvæmda í borginni í sumar. Margar götur eru komnar í slæmt ástand eftir vetrarþunga og lítið viðhald.

Það hefur varla farið framhjá borgarbúum að veturinn hefur verið mjög snjóþungur og voru tugir snjóruðningstækja að störfum á vegum Reykjavíkurborgar við að salta og ryðja göturnar þegar mest var í desember og janúar.

Brotnir kantsteinar eru einnig áberandi á mörgum stöðum þar sem tennur snjóruðningstækja hafa rekist utan í og brotið á leið sinni. Hrólfur Jónsson hjá framkvæmda- og eignasviði Reykjavíkur segir að nú sé verið að gera ástandsmat á götunum.

„Við vitum að við höfum dregið úr viðhaldi þannig að það gæti verið en á þessum tíma er ástandið lang verst þegar þetta kemur undan snjónum og síðan verður forgangsraðað um miðjan apríl og síðan útboð á viðgerðum og endurbótum sem verða síðan unnar í sumar," sagði Hrólfur Jónsson, sviðsstjóri framkvæmda- og eignasviðs.

Kostnaður við viðhald var dreginn saman um helming frá því fyrir hrun en aukafjárveiting hefur fengist fyrir sumarið.

„Það er hundrað milljónum sem verður varið umfram það sem var í fyrra, við munum gera við götur fyrir 400 milljónir í ár en vorum að gera fyrir 300 milljónir í fyrra svo þetta eru stórar tölur," sagði Hrólfur.

Hann hvetur fólk til að láta vita um slæmar holur eða skemmdir í hverfum á ábendingavef borgarinnar, Borgarlandið.