Fjárdráttur í Háskóla Íslands

Háttsettum starfsmanni Háskóla Íslands hefur verið vikið frá störfum en maðurinn er grunaður um fjárdrátt. Ekki liggur fyrir um hve miklar upphæðir ræðir en málið mun vera í rannsókn. Heimildir fréttastofu herma að grunur leiki á að fjárdrátturinn nái aftur til ársins 2007.

Maðurinn sem um ræðir mun hafa verið náinn samstarfsmaður háskólarektors.

Kristín Ingólfsdóttir, rektor Háskóla Íslands, sagði að málið væri nú til skoðunar.

„Við innra eftirlit í háskólanum vöknuðu spurningar um háttsemi varðandi fjármuni skólans," sagði Kristín aðspurð um málið. „Við höfum haft samband við Ríkisendurskoðun og bíðum nú upplýsinga. Það verður síðan ákveðið seinna hvort að kæra verði lögð fram.

Kristín vildi hvorki tjá sig um hver væri grunaður um fjárdráttinn né hversu mikið fé væri um að ræða.