Páll svarar Davíð fullum hálsi

Páll Magnússon, útvarpsstjóri, segir að skrif Davíðs Oddssonar, ritstjóra Morgunblaðsins, í Reykjavíkurbréfi blaðsins um síðustu helgi fela í sér svo mikla mannfyrirlitningu, forheimskun og heift að undrun sætir.

Páll skrifar grein í Morgunblaðið í dag þar sem hann svarar ritstjóranum fullum hálsi. Páll skrifar meðal annars: „Tveir menn, yfirmenn Seðlabanka og Fjármálaeftirlits, báru síðan ábyrgð á því að bankakerfið í höndum þessara misindismanna yxi ekki þjóðinni yfir höfuð - og brugðust báðir. Annar þeirra var ritstjóri Morgunblaðsins. Hann gerði sem sé hvort tveggja: sleppti hundunum lausum sem forsætisráðherra og vanrækti síðan sem seðlabankastjóri að kalla þá til baka þegar þeir lögðust á fólk og fé. Og þótt hann skrifi sig blóðlausan og rænulausan getur hann aldrei skrifað sig út úr þessum tveimur hlutverkum í harmleiknum mikla."

Páll vitnar í Reykjavíkurbréfið og segir að þar sé því haldið fram að fréttastofa RÚV sé þátttakandi í einu allsherjarsamsæri Samfylkingarinnar - sérstaklega í því að koma þjóðinni inn í Evrópusambandið.

„Á RÚV vinna um 50 fréttamenn. Allskonar fólk með mismunandi menntun og bakgrunn og áhugamál. Konur og karlar, sumir úr sveit, aðrir úr borg og enn aðrir úr sjávarþorpum. Ungir og gamlir með alls konar skoðanir á öllum málum - líka Evrópusambandinu. Það sem þessu fólki er þó sameiginlegt er að hafa valið sér fréttamennsku sem starfsvettvang - sem fag. Margir hafa lagt á sig langt nám á þessu sviði og aðrir búa að mikilli og fjölþættri starfsreynslu. Að tala um þetta fólk með þeim hætti sem ritstjórinn gerir felur í sér svo mikla mannfyrirlitningu, forheimskun og heift að undrun sætir," skrifar Páll.