Danir hrifnir af Pabbanum

Einleikurinn Pabbinn eftir Bjarna Hauk Þórsson hefur hlotið mjög góð viðbrögð í Danmörku. Fjölmiðlar hafa fjallað mikið um hann og dagblöðin Politiken og Berlinske Tidende splæstu bæði á hann fjórum stjörnum.

Eins og Fréttablaðið greindi frá í vor fer Anders W. Berthelsen, sem er þekktur fyrir hlutverk sitt í sjónvarpsþáttunum Krónikunni, með hlutverk Pabbans í dönsku uppfærslunni, sem var frumsýnd í Bellevue-leikhúsinu í Kaupmannahöfn 29. september. „Berthelsen er mjög þekktur og virtur leikari í Danmörku og er núna að leika eitt aðalhlutverkanna í Forbrydelsen 3 sem var að byrja í Danmörku,“ segir Bjarni Haukur. Berthelsen þykir lifa sig einkar vel inn í hlutverkið og standa sig með prýði.

Annar einleikur úr smiðju Bjarna Hauks, Afinn, var frumsýndur í Hamborg í Þýskalandi á fimmtudagskvöld. „Það gekk svakalega vel og fólk stóð upp og klappaði,“ segir hann. Búið er að bóka tvö hundruð sýningar á Afanum næstu tólf mánuðina um allt Þýskaland. Með hlutverk afans fer hinn þjóðþekkti þýski leikari Karl Dall. „Hann er náttúrulega enginn Siggi Sigurjóns en samt mjög góður,“ segir Bjarni hress.