Magnað sjónarspil yfir Jökulsárlóni - bein útsending

Í kvöld verður árviss flugeldasýning yfir Jökulsárlóni auk þess sem ísjakar verða lýstir upp með kertaljósi. Míla verður með beina útsendingu frá dýrðinni af vefmyndavél á þessari slóð. Því geta þeir sem ætla að hafa huggulegt kvöld heima við fylgst með sjónarspilinu úr sófanum. Sýningin hefst um ellefu og varir í um hálftíma.

Það ku vera mikil upplifun að vera viðstaddur sýninguna enda eru þar engin útiljós, engin hávaði og umhverfið dásamlegt.

Þetta verður í 11 sinn sem flugeldasýningin er haldin en hún er mikilvægur þáttur í fjáröflun björgunarfélags Hornafjarðar. Aðgangseyrir er þúsund krónur og rennur óskiptur til félagsins.

Von er á allt að þúsund manns á sýninguna í kvöld.

Á þessari slóð má skoða myndband af sýningunni í fyrra.