Eldur í verslunarmiðstöð á Ísafirði á háannatíma

Allt tiltækt lið Slökkviliðs Ísafjarðarbæjar var kallað út um sexleytið í kvöld þegar eldur kom upp í eldhúsi á veitingastaðarins Thai-Koon í verslunarmiðstöðinni Neista á Ísafirði, þar sem einnig er verslun Samkaupa, póstafgreiðsla og önnur verslun. Það er vefsíða Bæjarins bestu, bb.is, sem greinir frá.

Þar segir að húsið hafi verið rýmt og næsta nágrenni lokað, en engan sakaði.

Neisti komst að öllum líkindum upp í háf yfir eldavél á veitingastaðnum Thai-Koon. Þegar lögregla og slökkvilið komu á vettvang lagði eld og reyk upp úr þaki hússins og var því ákveðið að rýma svæðið í kring. Eldvarnarkerfi hússins fór í gang og tókst að mestu að slökkva eldinn áður en slökkviliðsmenn komu á vettvang.

Að sögn slökkviliðsins á Ísafirði var töluvert af fólki í húsinu, enda háannatími í verslunum og nokkrir gestir á veitingastaðnum. Engum varð meint af en töluverðar skemmdir urðu í eldhúsinu. Unnu slökkviliðsmenn við að reykræsta og hreinsa upp vatn eftir úðara eldvarnarkerfisins.