Erilsöm nótt í höfuðborginni

Nóttin var erilsöm hjá lögreglunni í Reykjavík. Tilkynnt var um tvær líkamsárásir í miðbæ Reykjavíkur. Sú fyrri átti sér stað við Nonnabita á Hafnarstræti en þar hafði stúlka slegið mann í andlitið svo á sást. Gerandinn flúði af vettvangi og eru óljósar upplýsingar um hann. Sá sem var sleginn ætlar ekki að kæra.

Óskað var eftir aðstoð lögreglu í Austurstræti við 10/11. Fyrr um nóttina hafði maður orðið fyrir sparki í höfuðið og var í slæmu ástandi. Lítið sem ekkert er vitað um gerandann. Manninum var komið á slysadeild.

Fjögur innbrot voru tilkynnt til lögreglu. Þar á meðal voru tveir menn vistaðir í fangageymslu en þeir eru grunaðir um þjófnað úr bifreiðum. Báðir voru undir vímuáhrifum.

Um sexleytið í nótt var síðan tilkynnt um grunsamlegar mannaferðir við hús við Laufásveginn. Í ljós kom að íbúi var þar læstur úti. Hann var aðstoðaður með að kalla til lásaopnara.