Nóttin hjá lögreglu höfuðborgarsvæðisins

Fjórir dvöldu fangageymslur lögreglunnar við Hverfisgötu í nótt.

Einn af þeim var maður sem handtekinn var fyrir að hlaupa upp á bifreiðar er stóðu við Skólavörðustíg. Sá var handtekinn rétt fyrir sex í morgun. Erfiðlega gekk að hemja hann og því var hann vistaður í fangaklefa. Rætt verður við hann um hegðan sína þegar af honum rennur. Ekki er vitað hve mikið tjón hlaust af uppátæki hans. Málið er á forræði lögreglustöðvar nr. 5 í Vesturbæ.

Þá voru tveir erlendir hælisleitendur handteknir í nótt þegar þeir reyndu að lauma sér um borð í skipið Skógarfoss á athafnasvæði Eimskipa við Sundagarða. Skipið á að sigla til Kanada. Útlendingastofnun hefur þegar verið kynnt um málið. Mennirnir verða yfirheyrðir vegna málsins í dag en þeir dvöldu í nótt í fangaklefa.

Sá fjórði sem vistaður var í fangageymslu var tekinn fyrir ölvun við akstur í Hafnarfirði.

Lögregla fékk tilkynningu um ránstilraun rétt fyrir klukkan fimm í nótt. Tveir farþegar hótuðu leigubílstjóra með hníf og heimtuðu peninga. Bílstjórinn hafði lítið reiðufé meðferðis. Þegar mönnunum varð ekki að ósk sinni reiddust þeir, skemmdu bílinn og komu sér svo á brott. Þeir eru enn ófundnir.

Þar fyrir utan var frekar rólegt með morgninum. Í nokkrum tilfellum var kvartað vegna lagningu bifreiða, í öðrum vegna hávaða eða ölvunar og óspekta. Leyst hefur verið úr þessum málum.