Orð Baracks Obama vekja sterk viðbrögð

Trúhneigðir íhaldsmenn í Bandaríkjunum hafa brugðist illa við yfirlýsingu Baracks Obama forseta, sem á miðvikudagskvöld sagðist fylgjandi hjónaböndum samkynhneigðra.

Þeir standa þétt að baki Mitt Romney, forsetaefni Repúblikanaflokksins, sem hefur verið andvígur hjónaböndum samkynhneigðra og ítrekaði andstöðu sína í gær.

Samkynhneigðir og stuðningsmenn þeirra ráða sér hins vegar ekki fyrir gleði og segja Obama hafa tryggt sér atkvæði þeirra allra í forsetakosningunum í nóvember.

Sjálfur segist Obama gera sér grein fyrir því, að ómögulegt sé að vita hvaða áhrif þetta hafi á niðurstöður þeirra kosninga.

„Það væri erfitt að færa rök fyrir því að þetta myndi ég gera til að ná pólitískum ávinningi, því satt að segja er ekki ljóst hvernig stjórnmálin munu bregðast við,“ sagði hann.

Víða um heim mæta samkynhneigðir þó enn harðri mótstöðu, andúð og ofbeldi.

Kínversk stjórnvöld litu til dæmis á samkynhneigð sem geðsjúkdóm allt til ársins 2001, og enn er farið með samkynhneigð þar í landi „eins og hún sé ekki til“, segir Xiong Jing, baráttukona fyrir réttindum samkynhneigðra. Hún segir að þar í landi sé bæði óraunhæft og ómögulegt að ná því fram að stjórnvöld viðurkenni hjónabönd samkynhneigðra.

Í Taílandi er ástandið ekki mikið skárra, þótt ferðamenn fái þá mynd af landinu að þar sé samkynhneigðum sýnt umburðarlyndi. „Ég var að missa vonina í baráttunni fyrir lögleiðingu hjónabands samkynhneigðra í Taílandi,“ segir Natee Teerarojjanapongs, sem barist hefur fyrir réttindum samkynhneigðra þar í landi, „en nú ýtir stuðningur Baracks Obama við mér og hvetur mig til að halda áfram.“

Yfirlýsing Obama hefur einnig skilað þeim árangri, að John Key forsætisráðherra rauf langvarandi þögn sína og sagði að stjórnin muni „við tækifæri“ skoða hvort hjónabönd samkynhneigðra verði leyfð.

Í Ástralíu situr Julia Gillard forsætisráðherra hins vegar föst við sinn keip og segist eftir sem áður andvíg hjónaböndum samkynhneigðra.gudsteinn@frettabladid.is