Átak vegna sumarstarfa ungra

Ráðist verður í sérstakt átak vegna sumarstarfa ungmenna í ár. Álíka verkefni var í gangi í fyrra þar sem velferðarráðuneytið og Vinnumálastofnun auglýstu 900 sumarstörf um allt land. Átakið á að fjölga störfum á vegum ríkisins og sveitarfélaga ætluðum námsmönnum og atvinnuleitendum. Vinnumálastofnun hefur nú þegar lagt inn umsókn til velferðarráðuneytisins vegna verkefnisins.

Sara Sigurðardóttir, formaður Stúdentaráðs Háskóla Íslands, segir átakið nauðsynlegt þar sem margir stúdentar séu í óvissu með sumarvinnu. „Við í Stúdentaráði vonum að umsóknin verði samþykkt þar sem atvinnutækifæri stúdenta eru ekki mörg,” segir Sara. „Átakið gekk vonum framar í fyrra þar sem tókst að búa til fjölda starfa fyrir ungmenni um allt land.“

Stúdentaráð hefur í hyggju að verðlauna það fyrirtæki sem ræður flesta stúdenta til starfa. „Við viljum gera okkar besta til að afla vinnu fyrir sem flesta stúdenta og því munum við afhenda því fyrirtæki sem reynist stúdentum í atvinnuleit best ákveðna heiðursviðurkenningu,“ segir Sara. - st