Störfum þurfi að fjölga

Birgir Ármannsson, þingmaður Sjálfstæðisflokksins, segir að ekkert bendi til þess að störfum sé að fjölga á Íslandi. Hann vísar tölur Hagstofunnar þess efnis og segir að þótt atvinnuleysi hafi minnkað eitthvað skýrist það ekki með nýjum störfum. Birgir spurði forsætisráðherra hvort hún hefði ekki áhyggjur af þessu.

„Ég deili þeirri skoðun með þingmanninum að ég vildi sjá atvinnuleysistölur fara neðar en þær gera," sagði Jóhanna. Benti hún á að miðað við tölur á árunum 2011 og 2012 hafi atvinnuleysistölur lækkað frá hruni. „Við höfum verið að koma fólki af atvinnuleysisskrá yfir í nám og yfir í atvinnutengd úrræði," sagði Jóhanna og sagði að ekki væri eðlilegt að tala ástandið niður, heldur ætti að tala kjark í fólk. Hún sagði jafnframt að fyrirtæki sem hefðu sagt upp fólki þegar kreppan var sem mest væru núna farin að endurráða fólk.

Birgir sagði það rétt sem forsætisráðherra hefði bent á að gripið hafi verið til ýmissa ráðstafana til að bregðast við atvinnuleysinu, með atvinnumarkaðsúrræðum og því að fólk færi í skóla. „Staðreyndirnar eru hins vegar þær að störfum hefur ekkert fjölgað. við fórum djúpt í kreppunni og það er ekkert sem bendir til að neitt sé að breytast að þessu leyti," segir Birgir