Pressustríð: Ritstjórar DV segja fyrirsögn Pressunnar ærumeiðandi

Ritstjórar DV hafa sent frá sér yfirlýsingu vegna fréttar sem birtist á Pressunni og er sögð vera ærumeiðandi. Vísir greindi frá málinu fyrr í dag en Reynir Traustason, annar ritstjóri DV, hefur krafið fréttavefinn um afsökunarbeiðni út af frétt sem vefurinn gerir upp úr grein Vilhjálms H. Vilhjálmssonar, lögmanns, þar sem hann gagnrýnir DV harðlega, en greinin birtist hér á Vísi í morgun. Fyrirsögnin sem um ræðir er:

„Ritstjórar DV flæktir í meint kynferðisbrotamál" - Viðeigandi og réttlátt? Hæstaréttarlögmaður spyr".

Yfirlýsingin er eftirfarandi:

Yfirlýsing: Ærumeiðandi fyrirsögn Pressunnar.is

Vefmiðillinn Pressan.is birtir í dag frétt, þar sem segir í fyrirsögn að ritstjórar DV séu flæktir í kynferðisbrot. Með fréttinni er birt mynd af öðrum ritstjóra DV.

Rétt er að taka fram að ritstjórar DV eru ekki flæktir inn í kynferðisbrot af neinu tagi. Þegar nánar er að gáð er um er að ræða falska ásökun, í dæmi sem Vilhjálmur Hans Vilhjálmsson lögmaður setur upp í grein í Fréttablaðinu.

Tilefni greinarskrifa Vilhjálms er að DV hefur greint frá því að þátttakendur í viðskiptagjörningum, sem nú eru til rannsóknar vegna gruns um stórfelld afbrot, hafi verið yfirheyrðir í lögreglurannsóknum, þrátt fyrir að vera ekki með réttarstöðu grunaðra. Mikilvægt er að gerður sé greinarmunur á því í opinberri umræðu um fjölmiðla þegar satt er sagt frá og þegar ekki er sagt satt frá. Falskar ásakanir um aðild að kynferðisbrotum í fyrirsögn eru ekki sambærilegar við fyrirsagnir sem greina frá raunverulegum yfirheyrslum yfir þátttakendum í viðskiptalífinu, vegna viðskipta þeirra sem talin eru liður í meintri markaðsmisnotkun eða annars konar efnahagsbrotum.

Þeir sem starfa á fjölmiðlum eru viðbúnir óvæginni gagnrýni, en það hefur ekki verið gefið skotleyfi til að ráðast að fjölmiðlafólki með uppdiktuðum ásökunum um aðild að kynferðisbrotum.

Ritstjórar DV, Jón Trausti Reynisson, Reynir Traustason.