Hafði í hótunum við starfsfólk 365 - tveir til viðbótar í gæsluvarðhald

Lögreglan á höfuðborgarsvæðinu ætlar að leggja fram kröfu um gæsluvarðhald yfir tveimur mönnum til viðbótar í tengslum við rannsókn á skipulagðri brotastarfsemi, en mennirnir voru handteknir í gær. Fjórir menn hafa þegar verið úrskurðaðir í gæsluvarðhald, líkt og fram kom í tilkynningu lögreglunnar í morgun.

Meðal þeirra sem voru úrskurðaðir í gæsluvarðhald í morgun voru þeir Börkur Birgisson og Annþór Karlsson. Báðir hafa áður verið dæmdir fyrir hrottaleg ofbeldisbrot.

Samkvæmt heimildum fréttastofu hafa mennirnir meðal annars verið kærðir fyrir hrottalega árás sem átti sér stað fyrir áramót.

Eins og fram hefur komið framkvæmdi lögreglan átta húsleitir í gærmorgun á heimilum og í fyrirtækjum í tengslum við rannsókn hennar á skipulagðri brotastarfsemi. Þá voru fimm handteknir og lagt var hald á meint þýfi og fíkniefni.

Þá var nítján ára piltur handtekinn í höfuðstöðvum 365 miðla í hádeginu eftir að hann ógnaði starfsfólki móttökunnar. Sá reyndist skyldur einum af sakborngunum sem voru úrskurðaðir í gæsluvarðhald í morgun. Maðurinn var ósáttur við fréttaflutning af málinu. Lögreglan var kölluð til. Maðurinn flúði af vettvangi en var handtekinn skömmu síðar. Hann er í yfirheyrslum. Samkvæmt upplýsingum frá lögreglu hefur hann ekki komist í kast við lögin vegna alvarlegra brota.