Könnun Capacent: Flestir vilja Sigríði á biskupsstól

Flestir nefna séra Sigríði Guðmarsdóttur, frambjóðanda til embættis biskups, í könnun sem Capacent stóð fyrir og segir frá á heimasíðu sinni. 23 prósent þeirra sem þátt tóku nefndu Sigríði en skammt á eftir kemur Þórhallur Heimisson með 21 prósent atkvæða. Þar á eftir koma síðan Agnes M. Sigurðardóttir og Örn Bárður Jónsson en nær 12% nefndu hvort þeirra.

„Tæplega 46% aðspurðra nefndu einhvern frambjóðenda en nær 40% sögðust ekki vita hvern þeir vildu helst sjá sem næsta biskup, rúmlega 5% sögðust ekki vilja svara því og ríflega 9% allra aðspurðra sögðust ekki vilja sjá neinn þessara frambjóðenda sem næsta biskup Íslands," segir í tilkynningu Capacent.

Þá segir að Sigríður virðist vinsælla biskupsefni hjá konum en körlum „og það sama má segja um Þórhall. Karlar eru líklegri en konur til að segjast ekki vilja sjá neinn frambjóðenda sem næsta biskup Íslands og yngra fólk er einnig líklegra til þess en eldra fólk."

„Þeir sem hafa lokið háskólaprófi eru líklegri til að vilja sjá Sigríði í biskupsstól en þeir sem hafa minni menntun að baki, og þeir sem styðja ríkisstjórnina eru einnig líklegri til þess en þeir sem styðja hana ekki," segir einnig en hér má kynna sér niðurstöðurnar nánar.