Fangelsismálastofnun skoðar viðbrögð við gengjamyndum í fangelsum

Fangelsismálastofnun skoðar nú hvernig hægt er að bregðast við gengjamyndun innan veggja fangelsanna. Fangaverðir óttast margir um öryggi sitt en forsprakkar bæði vélhjólasamtakanna Outlaws og Hells Angels eru í fangelsi.

Lögregla hefur haft áhyggjur af umsvifum vélhjólasamtakanna Hells Angels og Outlaws hér á landi um nokkurt skeið. Þá hafa ofbeldismál sem tengjast þessum samtökum oft komið upp undanfarið. Nú er staðan sú að forsprakki annars samtakanna situr af sér fangelsisdóm á Litla Hrauni en hinn er í gæsluvarðhaldi, verði hann dæmdur gæti svo farið að hann afpláni dóminn einnig á Litla Hrauni. Formaður fangavarðafélagsins segir nauðsynlegt að huga að öryggi fangavarða. Sumir þeirra hafa miklar áhyggjur af öryggi sínu. Forstjóri Fangelsismálastofnunar segir gengjamyndum þegar sjást innan veggja fangelsanna.

„Við reynum að skipta hópunum upp eftir bestu getu, við erum nú með sex fangelsi, við þyrftum vissulega að hafa smærri einingar og fleiri fangelsi til að geta skilið þá að með fullkomnum hætti," sagði Páll Winkel, forstjóri Fangelsismálastofnunar.

Þá segir Páll sérsveit fangavarða til staða sem geti tekið á erfiðum málum sem upp geta komið.

Verið sé að skoða hvernig hægt sé að bregðast við gengjamynduninni.

„Við erum að yfirfara allar reglur okkar, verklagsreglur og við erum að fara í gegnum lögin sem við vinnum eftir og það verður tekið á þessu," sagði Páll.