Rannsókn hafin á brunanum á Selfossi

Lögreglurannsókn er hafin á stórbrunanum á Selfossi í gær. Eldurinn fór þar í gegn um eldvegg sem settur var upp samkvæmt ráðleggingum Brunavarna Árnessýslu. Eigandi röraverksmiðjunnar Sets segist aldrei hafa verið óttasleginn.

Lögreglumenn hófu rannsókn á brunanum strax í morgun. Talið er að kviknað hafi í út frá rafmagnstöflu.

Eldurinn kviknaði í geymsluhúsnæði röraverksmiðjunnar, fór í gegn um eldvegginn, og breiddi sig yfir í húsnæði 800 bars.

Það var lán í óláni fyrir Set að eldurinn kom þar upp í geymslunni.

„Þetta fór bara eins og vel og það mögulega gat miðað við það sem skeði, það kviknaði hér í austasta húsinu af mörgum sem við eigum hér á morgun lóðum," sagði Einar Elíasson, eigandi Set hf. „Þetta er skaði sem tefur lítið fyrir vinnslu, þetta er efnisgeymsla, aðallega járnförn inni í húsinu."

Af ellefu byggingum röraverksmiðjunnar Sets er því aðeins ein brunnin. Lóðin sem byggingarnar standa á nær yfir fimmtán þúsund fermetra og var starfsemin víða farin af stað í dag, aðeins degi eftir brunann mikla.

Starfsmenn Sets voru að snæða hádegismat þegar eldurinn kom upp.

Einar segir að hann og starfsmenn Set hf. hafi ekki verið óttaslegnir. „Það var enginn maður í hættu og þetta var ekkert sem ógnaði neinum, nema reykurinn, hann náttúrulega truflaði hér starfsemi á svæðinu," sagði Einar.

Hefði eldurinn náð að læsa sig í plaströrunum hefði eldurinn orðið enn hættulegri og slökkvistarf tekið lengri tíma.

Einar reiknar ekki með að endurbyggja geymsluna enda nóg rými í hinum húsunum.