Íslendingar hlupu 112 kílómetra yfir Sahara-eyðimörkina

Arnaldur Birgir Konráðsson, framkvæmdastjóri og annar eigenda Boot Camp, og Ágúst Guðmundsson, slökkviliðsmaður á höfuðborgarsvæðinu, luku í dag eyðimerkurhlaupi yfir Sahara-eyðimörkina fyrstir Íslendinga. Það má segja að þetta hafi ekki verið neitt skemmtiskokk hjá félögunum en hlaupið er 112 kílómetrar.

Um 160 manns tóku þátt í hlaupinu í ár en lagt var af stað frá Túnis á þriðjudaginn og tók hlaupið því fjóra daga. Á fyrstu dögunum var hlaupið 23 kílómetra og í gær var hlaupið heilt maraþon. Hlaupinu lauk í dag með 23 kílómetra hlaupi. Arnaldur og Ágúst hafa undirbúið sig í nokkurn tíma en til stóð að taka þátt í hlaupinu á svipuðum tíma í fyrra en vegna stríðsátaka í Túnis, Líbíu og nærliggjandi svæðum var því frestað með skömmum fyrirvara.