Jiabao ánægður með vaxandi tengsl Kína og Íslands

Wen Jiabao forsætisráðherra Kína er ánægður með hve tengsl Kína og Íslands hafa vaxið og dafnað á undanförnum árum.

Þetta kom fram þegar Jiabao og Ólafur Ragnar Grímsson forseti Íslands áttu fund á hliðarlínunni á Heimsþingi hreinnar orku sem nú stendur yfir í Abu Dhabi í Sameinuðu furstadæmunum.

Jiabao vill efla tengslin við Ísland ennfrekar í náinni framtíð að því er segir í frétt á hinni opinberu kínversku vefsíðu cri.cn. Þar kemur fram að Ólafur Ragnar Grímsson er sammála Jiabao í þessum efnum en forsetinn lýsti jafnframt yfir ánægju sinni með stuðning Kínverja við Íslendinga sem og Evrópubúa í kreppunni.