Bjarni Benediktsson: Forsætisráðherrann misbeitti valdi sínu tvívegis

"Það sem er athyglisvert í þessu er það að forsætisráðherrann, sem var sú sem krafðist þess að niðurstaða kærunefndar jafnréttismála yrði bindandi, reyndi við fyrsta tækifæri að líta framhjá þeirri niðurstöðu og höfðaði dómsmál til þess að fá því hnekkt," segir Bjarni Benediktsson, formaður Sjálfstæðisflokksins, um niðurstöðu Héraðsdóms Reykjavíkur sem staðfesti úrskurð kærunefndar jafnréttismála um að forsætisráðuneytið hefði brotið jafnréttislög þegar Anna Kristín Ólafsdóttir hafi verið að minnsta kosti jafn hæf til þess að gegna starfi skrifstofustjóra á skrifstofu stjórnsýslu- og samfélagsþróunar í forsætisráðuneytinu.

Þá var ríkinu einnig gert að greiða henni hálfa milljón í miskabætur vegna yfirlýsingar ráðuneytisins sem var birt á heimasíðu þess þegar úrskurður kærunefndarinnar var kunngerður á síðasta ári.

„Nú er það staðfest, bæði fyrir kærunefnd og héraðsdómi, að hún braut lög og nú er það spurning hvort hún viðurkenni það og horfist í augu við þá niðurstöðu. Enda kominn tími til," segir Bjarni um niðurstöðu Héraðsdóm Reykjavíkur.

Hann bendir á að Héraðsdómur Reykjavíkur hafi síðan greitt Önnu Kristínu miskabætur vegna viðbragða ráðuneytisins við úrskurði kærunefndar jafnréttismála.

„Þannig það var ekki nóg með að héraðsdómur komst að þeirri niðurstöðu að jafnréttislög voru brotin, heldur hélt hún áfram að brjóta á rétti hennar með þeim afleiðingum að miskabótakrafa var samþykkt," segir Bjarni og bætir við að lokum: „Forsætisráðherrann misbeitti því ekki valdi sínu einu sinni, heldur tvisvar."