Obama breiddi yfir Cameron

David Cameron, forsætisráðherra Bretlands, greindi frá því í dag að kollegi hans í Bandaríkjunum, Barack Obama, hefði breitt yfir hann þegar þeir flugu með flugvél Bandaríkjaforseta.

Cameron sagði að Obama hefði boðið honum að nota rúmið sitt í flugvélinni. Vinirnir flugu til Washington eftir að hafa horft á körfuboltaleik í Dayton, Ohio.

„Klukkan var fjögur að nóttu til að breskum tíma. Ég var afar þreyttur og Obama spurði hvort að ég vildi ekki nota rúmið hans," sagði Cameron í dag.

„Ég gerði það og Obama útskýrði fyrir ritara mínum að ég hefði lagt mig - hann sagðist hafa breitt yfir mig.," sagði Cameron. „Ég er nokkuð viss um að þetta hafi ekki gerst áður."

Cameron sagði að tengsl forsætisráðherra Bretlands og Bandaríkjaforseta hefðu ávallt verið sérstök.

„Við munum öll eftir sögunni þegar Churchill var gestur í Hvíta húsinu. Hann var í baði þegar Roosevelt gekk inn. Churchill reis þá úr baðinu og sagðist ekkert hafa að fela fyrir Bandaríkjaforseta."

Cameron snæddi síðan með forsetahjónunum og gestum í Washington. „Það var mikill heiður að fá að sitja við hlið Michelle Obama. Því miður sat George Clooney hinum megin við hana og ég átti í erfiðleikum með keppa um athygli hennar."