Ekki var auglýst eftir sérfræðingi í þróunarmálum heldur lögð áhersla á að fá mann með reynslu úr stjórnkerfinu til að stýra verkefni í Malaví. Þetta segir framkvæmdastjóri Þróunarsamvinnustofnunar um umdeilda ráðningu. Hann neitar afskiptum ráðherra.
Þróunarsamvinnustofnun tilkynnti um ráðningu Guðmundar Rúnars Árnasonar um miðjan mánuðinn. DV hefur að undanförnu fjallað um ráðninguna með vísan til utanríkisráðherra með fyrirsögninni „Góður vinur ráðherra"
Auglýsingin var birt þann 19. maí. Þar sést að menntunarkröfur eru „Háskólamenntun sem nýtist í starfi," en það ekki tíundað frekar. Þá er reynsla af störfum í þróunarlöndum sögð æskileg. Umsóknarfrestur var til og með 5. júní, eða rúmar tvær vikur. Alls sóttu 75 um starfið þar af fjöldi þróunarsérfræðinga.
Starfsmannastjóri stofnunarinnar sagði sig frá ráðningunni vegna tengsla við fjölda umsækjenda. Hans í stað var kallaður inn sviðsstjóri úr utanríkisráðuneytinu. Guðmundur Rúnar er fyrrverandi bæjarstjóri Hafnarfjarðar þar sem hann sat fyrir hönd Samfylkingarinnar.
Engilbert Guðmundsson, framkvæmdastjóri Þróunarsamvinnustofnunar Íslands, segir það af og frá að ráðningin sé pólitísk og að utanríkisráðherrann hafi ekki komið nálægt málinu.
Innlent
