Unglingur fær ekki að bjóða klámmyndastjörnu á dansleik

Átján ára gamall nemandi í Bandaríkjunum sem bauð 600 klámstjörnum að fylgja sér á lokadansleik fær ekki að mæta á ballið með þeirri sem þáði boðið.

Mike Stone sendi út 600 skilaboð til þekktra klámstjarna á samskiptasíðunni Twitter. Hin 19 ára gamla Megan Piper svaraði kalli Stone.

Í skilaboðunum sagði Stone að sú sem myndi fara með honum á ballið myndi fá heimsklassa nudd seinna um kvöldið.

Stone sagði AP fréttastofunni að hann hafi leitað á Twitter eftir að nokkrar stúlkur í skólanum hans vildu ekki fara með honum.

„Mér datt ekki í hug að þetta myndi komast í blöðin," sagði Stone. „Vinir mínir í skólanum styðja mig. Flestum finnst þetta vera frábært."

Skólayfirvöld í Minnesota er þó ekki jafn hrifin. Piper, sem hefur leikið í fjölda klámmynda, hefur verið meinað að mæta á dansleikinn.

Í yfirlýsingu frá skólanum kemur fram að Piper myndi hafa slæm áhrif á siðferði nemenda.

Samkvæmt AP fréttastofunni er Piper eyðilögð vegna málsins. Hún segist hafa hlakkað mikið til að fara á dansleikinn enda fékk hún aldrei tækifæri til að fara á slíkt lokahóf.

„Ég get gert kvöldið ógleymanlegt fyrir Mike," sagði Piper. „Þá fengi ég líka tækifæri til að fara á lokadansleik - við græðum því bæði á þessu."

Stone og Piper hafa ákveðið að halda sitt eigið ball og er öllum nemendum skólans boðið á það.

Aðspurð um nuddið sem Stone hafði lofað henni sagði Piper að ef aðstæður væru réttar þá myndi hún þiggja það.