jólalög í vestri

Okkur þótti tímabært að bjóða til jólatónleika og vitum ekki til þess að vísitölufjölskylda að vestan hafi áður haldið tónleika saman,“ segir Theodóra Þorsteinsdóttir, skólastjóri Tónlistarskóla Borgarfjarðar. Theodóra ætlar að syngja jólalög með eiginmanni sínum Olgeiri Helga Ragnarssyni og dætrunum Sigríði Ástu og Hönnu Ágústu í Borgarneskirkju í kvöld.

Theodóra stundaði nám við Söngskólana í Reykjavík og Vínarborg og hefur víða komið fram sem söngkona.

„Að námi loknu bauðst mér staða skólastjóra við Tónlistarskóla Borgarfjarðar og ég flutti aftur heim í Borgarnes. Þá kynntist ég Olgeiri, sem sótti söngtíma hjá mér, og við sungum okkur inn í hjörtu hvors annars,“ segir Theodóra og brosir en dætur þeirra Olgeirs stunda nú báðar nám við Söngskólann í Reykjavík.

„Það er indæll jólabíltúr að skjótast í Borgarnes á aðventunni. Borgnesingar skreyta hús sín mikið og heillandi að keyra um sveitirnar í vetrarbúningi og sjá jólaljósin blika á sveitabæjunum,“ segir Theodóra.

Jólalög á dagskránni koma úr ýmsum áttum; róleg, fjörug og hátíðleg í bland.

„Jól eru tími hefða og allt frá því stelpurnar voru litlar höfum við sungið saman um leið og við kveikjum á aðventukertunum. Á Þorláksmessu förum við svo í bústaðinn okkar í Lundarreykjadal og höggvum jólatré sem við skreytum við heimkomuna,“ segir Theodóra, sem ólst upp við tíðan og ljúfan söng móður sinnar.

„Ein fegursta minning æskuáranna er fimmtudagskvöldin með mömmu. Pabbi var í Rótarý og alltaf þegar hann fór á fund settist mamma með gítarinn inn í stofu og söng með okkur systkinunum. Þær töfrandi stundir voru yndisleg upplifun fyrir okkur krakkana.“