Vilja ekki loka Laugaveginum fyrir umferð - kenna bílahatri um

Fjörutíu kaupmenn rótgróinna verslunar á Laugaveginum mótmæla áformum um lokun götunnar fyrir bílaumferð. Þeir segja rekstrargrundvöll verslana vera í húfi.

Kaupmennirnir afhentu borgarstjóra undirskriftarlista í ráðhúsinu í morgun. Björn Jón Bragason verslunarmaður í verslun Guðsteins fer fyrir hópnum.

„Verslun hefur einfaldlega hrunið þá daga sem það er lokað fyrri bílaumferð, langflestir viðskiptavina okkar koma gagngert í miðborgina til að versla í ákveðnum búðum og koma á sínum bíl og vilja geta lagt sínum bíl nálægt verslunum og þetta er í raun bara aðför að einkabílnum um leið," segir Björn Jón í samtali við fréttamann.

Hann segir þá tilraun síðasta sumar að loka neðri hluta Laugavegar fyrir bílaumferð hafi orðið til þess að velta dróst saman í flestum verslunum.

„Því hefur reyndar verið haldið fram að það sé meira líf á Laugaveginum og það er gott og vel en það segir ekki til um veltu í búðunum það er að segja hversu mikil umferð er á gangstéttunum," segir Björn Jón.

Hann segir hugmyndir um að loka stærri hluta af Laugaveginum næsta sumar og jafnvel að loka götunni alveg, þá er verið að hækka bílastæðagjöld um tugi prósenta. Björn segir þetta í andstöðu við þróun í verslunargötum erlendis.

„Til að mynda í Bretlandi er umræða um það að fækka til að mynda gjaldskyldum stæðum í nágrenniverslunargata og lækka bílastæðagjöld," segir Björn Jón sem bætir við:

„Þetta er partur af hatri á einkabílnum sem maður heyrir hjá ansi mörgum kjörnum fulltrúum Reykvíkinga en það sem við höfum áhyggjur af er verslunin sjálf og hún hreinlega fái ekki þrifist."